England: Fagnaði leikjametinu með sigri - Chelsea fékk á sig jöfnunarmark í uppbótartíma

Eina mark Chelsea kom á 4. mínútu. Moises Caicedo átti gersamlega ruglaða sendingu út á vinstri kantinn á Pedro Neto sem kom með fasta fyrirgjöf meðfram grasinu og á nafna sinn Joao Pedro sem tæklaði boltann í netið.

Burnley-menn voru inn í leiknum en náðu ekki að koma marki á Chelsea fyrir lok hálfleiksins.

Chelsea var líklegra til að bæta við þegar leið á síðari hálfleikinn, en seinna gula spjald Wesley Fofana á 72. mínútu eftir illa tímasetta tæklingu gaf Burnley von.

Það fór um heimamenn á lokamínútunum. Burnley setti pressu og voru föstu leikatriði James Ward-Prowse að ógna, en jöfnunarmarkið kom einmitt eftir eitt slíkt.

Hann tók hornspyrnu inn á teiginn á Zian Flemming sem stangaði boltann í netið í uppbótartíma. Burnley var ekki hætt og reyndi að kreista fram sigurmark, en hafði ekki erindi sem erfiði.

Gestirnir taka þó stigið á meðan þetta gæti reynst dýrkeypt fyrir Chelsea þegar talið verður upp úr pokanum í lok tímabils. Chelsea er í 4. sæti með 45 stig á meðan Burnley er í næst neðsta sæti með 19 stig.

Brighton fagnaði 2-0 sigri á Brentford í leik sem fer í sögubækurnar í ensku úrvalsdeildinni.

James Milner var í byrjunarliði Brighton og bætti þar um leið leikjamet Gareth Barry í ensku úrvalsdeildinni. Þetta var 654. deildarleikur Milner.

Diego Gomez og Danny Welbeck sáu til þess að gera daginn eftirminnilegan með tveimur mörkum á síðustu fimmtán mínútum fyrri hálfleiks.

Níunda mark Welbeck í deildinni en sigurinn fleytti Brighton upp í 12. sæti með 34 stig á meðan Brentford er í 7. sæti með 40 stig.

Hákon Rafn Valdimarsson sat allan tímann á varamannabekk Brentford.

Tammy Abraham bjargaði stigi fyrir Aston Villa í 1-1 jafntefli gegn Leeds á Villa Park.

Anton Stach skoraði mark umferðarinnar með þrumuskoti úr aukaspyrnu á 31. mínútu. Emiliano Martínez, markvörður Villa, var að búast við því að Stach myndi koma boltanum inn á teiginn, en í staðinn skaut hann föstu skoti efst í vinstra hornið. Óverjandi fyrir Martínez.

Abraham kom inn af bekknum hjá Villa í seinni hálfleik og jafnaði metin tæpum stundarfjórðungi síðar. Þetta var annar leikurinn í röð sem hann skorar fyrir Villa, en hann kom til félagsins frá Besiktas undir lok vetrargluggans.

Aston Villa er áfram í 3. sæti með 51 stig en Leeds í 15. sæti með 31 stig.

Brentford 0 - 2 Brighton
0-1 Diego Gomez ('30 )
0-2 Danny Welbeck ('45 )

Aston Villa 1 - 1 Leeds
0-1 Anton Stach ('31 )
1-1 Tammy Abraham ('88 )

Chelsea 1 - 1 Burnley
1-0 Joao Pedro ('4 )
1-1 Zian Flemming ('90 )
Rautt spjald: Wesley Fofana, Chelsea ('72)