England: Léleg færanýting á London Stadium

West Ham United og Bournemouth áttust við í miklum baráttuleik í ensku úrvalsdeildinni í dag.

Fallbaráttulið West Ham var sterkari aðilinn í fyrri hálfleik en tókst ekki að nýta færin sem sköpuðust.

Seinni hálfleikurinn var opinn og skemmtilegur þar sem bæði lið komust nálægt því að skora, en einhvern veginn rataði boltinn aldrei í netið.

Rayan átti skot í stöng fyrir Bournemouth en Hamrarnir fengu fleiri og betri færi, en áttu í basli með að hitta á rammann.

Mads Hermansen og Djordje Petrovic áttu góðar vörslur þegar þeirra var þarfnast og héldu báðir hreinu.

Lokatölur urðu því 0-0 og er West Ham núna tveimur stigum frá Nottingham Forest sem situr í öruggu sæti.

Bournemouth er áfram í efri hlutanum, með 38 stig eftir 27 umferðir - sjö stigum frá meistaradeildarsæti.