Ólafur Kristjánsson, þjálfari FH, var spurður út í miðjumanninn Emil Hallfreðsson í hlaðvarpsþættinum Dr. Football í gær.
Emil hefur verið að æfa með FH-ingum í vetur og hann útilokar ekki að spila með liðinu í Pepsi Max-deildinni í sumar. Hinn 35 ára gamli Emil er samningsbundinn Padova í C-deildinni á Ítalíu, en hann gæti komið á láni hjá FH á meðan hlé er á keppni á Ítalíu.
„Úff, hvað hann er góður í fótbolta," sagði Ólafur. „Hann er ekki kominn, við þurfum að sjá hvað gerist með hans mál á Ítalíu. Emil Hallfreðsson er með gríðarlega gæði og bara það að hann sé að æfa með okkur lyftir æfingunum upp."
„Það er unun að fylgjast með honum."
Emil, sem á að baki 71 A-landsleik, lék síðast með FH árið 2004 þegar liðið varð Íslandsmeistari.
Hitti Óla í morgun. Hann á afmæli en ég var það harður við hann að ég óskaði honum ekki einu sinni til hamingju með daginn.
— Hjörvar Hafliðason (@hjorvarhaflida) May 20, 2020
Ræddum allt sem viðkemur FH og hvort það sé ekki tímabært að hann fari að vinna titil. https://t.co/dFImCqWouQ
Athugasemdir