Lið 1. umferðar í Pepsi kvenna: Þrjár þrennur

Stórleikur umferðarinnar var í Garðabænum þar sem Breiðablik gerði sér lítið fyrir og vann Stjörnuna í átta marka leik, 6-2. Berglind Björg Þorvaldsdóttir skoraði þrennu í leiknum. Agla María Albertsdóttir og varnarmaðurinn Samantha Lofton áttu einnig góðan leik.

Miðjumennirnir Thelma Björk Einarsdóttir og Ásdís Karen Halldórsdóttir áttu góðan leik fyrir Val í 8-Þ0 sigri gegn Selfossi. Þar skoraði Ásdís Karen einmitt þrennu.

Sandra María Jessen henti einnig í þrennu fyrir Þór/KA gegn Grindavík. Bianca Sierra var einnig öflug í Þór/KA.

Karólína Jack var best hjá nýliðum HK/Víkings sem unnu óvæntan en jafnframt mjög svo góðan 2-1 sigur gegn FH.

Í Eyjum var Clara Sigurðardóttir best Eyjastelpna í 2-0 sigri gegn KR en þessi ungi og efnilegi leikmaður skoraði eitt og lagði upp annað mark fyrir ÍBV. Emily Armstrong markvörður ÍBV þurfti að hafa fyrir því að halda markinu hreinu í leiknum og þá var Caroline Van Slambrouck mikilvæg í vörninni.