Matthías Vilhjálmsson
„Bara lélegt. Við vorum ekki nógu góðir í báðum boxum okkar eigin vítateig og í þeim færum sem við fengum svo þetta er mjög súrt.“ Sagði Matthías Vilhjálmsson fyrirliði FH eftir 2-1 tap Hafnfirðinga gegn Keflavík á HS-Orkuvellinum nú fyrr í kvöld.
Lestu um leikinn: Keflavík 2 - 1 FH
Sóknarleikur FH var stirður að miklu leyti í leiknum og ákvarðanataka á síðasta þriðjungi ekki upp á sitt besta. Þeir fengu þó sín færi sem ekki nýttust en meðal annars varði Sindri Kristinn Ólafsson markvörður Keflavíkur tvisvar sinnum maður á móti manni.
„Við fengum svo sannarlega færi til þess að fá eitthvað út úr þessum leik en það er lítið annað við því að segja en að við erum bara ekki betri en þetta á þessum tímapunkti og við verðum bara að spýta í lófanna og gera betur.“
Að sjö umferðum loknum er FH í sjöunda sæti deildarinnar með sjö stig sem verður að teljast langt frá þeim væntingum sem gert var til liðsins fyrir mót.
„Byrjunin hefur ekki verið nægjanlega góð. Fjögur töp í sjö leikjum, það segir sig sjálft að það er ekki nægjanlega gott. Nú eigum við leik gegn Kára í bikarnum á miðvikudaginn og þurfum að klára það. Svo eigum við erfiðan heimaleik á móti KR og þurfum að gjöra svo vel að vinna þann leik,“
Sagði Matthías en allt viðtalið má sjá hér að ofan.
Athugasemdir
