Besta deildin: Svakaleg endurkoma hjá HK gegn KR

Það var hreint út sagt ótrúlegur leikur í Kórnum í kvöld þar sem HK fékk KR í heimsókn en þessi leikur átti upphaflega að fara fram fyrir tveimur vikum síðan.

KR var með öll völd á vellinum í fyrri hálfleik og var verðskuldað með tveggja marka forystu í hálfleik.

Allt annað var upp á teningnum í seinni hálfleik en Eiður Gauti Sæbjörnsson minnkaði muninn strax í upphafi seinni hálfleiks og jafnaði metin síðar.

Atli Sigurjónsson hélt síðan að staðan hafi verið orðin 3-2 en markið var dæmt af þar sem hann var talinn brotlegur.

Dramatíkinni var ekki lokið því stuttu síðar fullkomnaði Atli Þór Jónasson endurkomu HK þegar hann skallaði boltann í netið eftir sendingu frá Tuma Þorvarssyni sem var nýkominn inn á sem varamaður.

HK fór uppúr botnsætinu með þessum sigri og jafnaði Vestra að stigum en KR er aðeins einu stigi frá fallsæti.