Þjálfari U21 landsliðsins
Ólafur Kristófer Helgason
Sveinn Margeir er fullur sjálfstrausts
Davíð Snorri Jónasson, þjálfari U21 landsliðsins, býst við svakalegum leik þegar Ísland mætir Tékklandi í fyrri umspilsleik liðanna á morgun. Liðið sem hefur betur í einvíginu fer á EM næsta sumar.
Leikurinn á morgun er heimaleikur Íslands og hefst klukkan 16:00 á Víkingsvelli. Smelltu hér til að tryggja þér miða.
Leikurinn á morgun er heimaleikur Íslands og hefst klukkan 16:00 á Víkingsvelli. Smelltu hér til að tryggja þér miða.
„Tékkarnir eru búnir að vera mjög góðir í þessari undankeppni og hafa getað blandað leiknum sínum aðeins. Þetta eru kraftmiklir strákar, við þurfum að vera tilbúnir að taka á því, varnarlega erum við tilbúnir í að þeir pressi okkur og sóknarlega hafa þeir verið tilbúnir að aðlaga leik sinn eftir því hvernig leikurinn þróast. Það má búast við ýmsu frá þeim en fyrst og fremst held ég að þetta verði mjög kraftmikið lið," sagði Davíð.
Hann vildi ekki gefa upp hvort hann ætlaði að spila með tvo eða þrjá hafsenta í leiknum á morgun.
Tvær breytingar hafa orðið á upprunalega landsliðshópnum. Þeir Kristall Máni Ingason og Finnur Tómas Pálmason geta ekki spilað vegna meiðsla og inn í hópinn koma þeir Sveinn Margeir Hauksson og Ólafur Kristófer Helgason. Er þetta búið að vera eitthvað púsluspil?
„Þegar við settum hópinn upp vissum við að Kristall væri tæpur og það kom smá bakslag hjá Finni Tómasi. Nei nei, það eru góðir leikmenn fyrir utan hóp þannig það var allavega mjög gott að ef við þyrftum að gera breytingar þá vissi ég að það voru strákar sem voru klárir, hungraðir og ferskir að koma inn."
„Sveinn Margeir er fullur sjálfstrausts, búinn að spila vel í (Bestu) deildinni, búinn að spila mjög vel í góðu KA liði. Hann kemur dálítið heitur inn í þetta. Ég talaði við Óla í síðustu viku um að koma og æfa með liðinu hérna heima og við vorum alltaf með það bakvið eyrað að við gætum þurft að taka þrjá markmenn með út til Tékklands. Nú var möguleiki að gera breytinguna og við ákváðum að gera hana strax þannig Óli gæti undirbúið sig."
Ólafur er markvörður en Finnur Tómas er varnarmaður. „Við erum með ákveðin sæti sem við getum fyllt, vorum búnir að hugsa um að taka þriðja markmanninn út. Óli er ekki að fara spila hafsent, ég get lofað þér því. Við erum með fjölhæfa stráka sem geta leyst það ef við lendum í vandræðum."
Birkir Heimisson er miðjumaður sem hefur leyst stöðu varnarmanns í U21 liðinu. Var hann nálægt því að fá kallið?
„Já, Birkir er einn af þeim leikmönnum sem eru búnir að vera nálægt hópnum, búinn að standa sig gríðarlega vel fyrir okkur, en við mátum þetta svona núna."
Hvernig verður nálgunin á morgun, ætlaru að fara varkár inn í leikinn?
„Við erum dálítið þannig að við stígum bensínið í botn og fulla ferð. Það er allavega hugmyndin að gera það þannig," sagði Davíð.
Viðtalið í heild sinni má sjá í spilaranum að ofan
