Spánn: Atletico vann Evrópuslag og tók þriðja sætið

Atletico Madrid tók á móti Villarreal í Evrópubaráttunni á Spáni og lenti undir eftir stundarfjórðung, þegar Paco Alcacer skoraði með góðu skoti rétt fyrir utan teig.

Heimamenn voru mun betri fyrir leikhlé og verðskulduðu jöfnunarmarkið sem Angel Correa skoraði á 40. mínútu, eftir frábæra sendingu frá Sime Vrsaljko.

Síðari hálfleikurinn var talsvert jafnari en færanýting Atletico gerði gæfumuninn.

Koke skoraði með skalla eftir fyrirgjöf frá Correa á 64. mínútu og bætti Joao Felix við marki tíu mínútum síðar.

Felix innsiglaði þannig sigurinn og er Atletico búið að taka þriðja sæti deildarinnar af Sevilla á markatölu. Villarreal er áfram í sjöunda sæti, tveimur stigum frá Evrópusvæðinu.