Lengjudeildin: Átta marka leikur og dramatík á Nesinu - Njarðvík tókst ekki að skora gegn Ægi

Grótta fékk Vestra í heimsókn en liðin mættust í Mjólkurbikarnum á Ísafirði fyrir rúmri viku síðan þar sem Grótta hafði betur.

Grótta byrjaði betur og komst yfir þegar hinn 16 ára gamli Mattías Kjeld skoraði frábært mark. Chriss-Albin Mörfelt jafnaði metin fyrir Vestra undir lok fyrri hálfleiks.

Grótta fékk vítaspyrnu strax í upphafi seinni hálfleiks og Mattias skoraði sitt annað mark og kom Gróttu aftur yfir. Andri Freyr Jónasson bætti síðan við þriðja markinu.

Thibang Phete skoraði fyrir Vestra eftir hornspyrnu og það var vægast sagt spenna í lokin. Þegar tvær mínútur voru til loka venjulegs leiktíma tókst Vestra að jafna metin þegar Guðmundur Páll Einarsson kom boltanum í netið.

Aðeins tveimur mínútum síðar komst Björgvin Brimi Andrésson einn í gegn og endurheimti forystuna fyrir Gróttu og í blálokin innsiglaði Alexander Emil Stefánsson dramatískan sigur Gróttu.

Njarðvík fékk Ægi í heimsókn. Heimamenn voru með yfirhöndina í fyrri hálfleik en tókst ekki að koma boltanum í netið.

Eftir klukkutíma leik var Kristinn Ásgeir Þorbergsson nálægt því að koma Ægi yfir en átti skot í slá. Bæði lið fengu úrvalsfæri til að skora undir lokin en markalaust jafntefli var niðurstaðan.

Fylkir er á toppnum með 12 stig, tveggja stiga forystu á Þrótt og Aftureldingu. Vestri er í 7. sæti með 7 stig, Grótta í 9. sæti með 6 stig, Njarðvík í 10. sæti með fimm stig, Völsungur í 11. sæti með tvö og Ægir rekur lestina með eitt stig.

Grótta 5 - 3 Vestri
1-0 Mattías Kjeld ('21 )
1-1 Chriss-Albin Mörfelt ('45 )
2-1 Mattías Kjeld ('51 , víti)
3-1 Andri Freyr Jónasson ('68 )
3-2 Thibang Sindile Theophilius ('82 )
3-3 Guðmundur Páll Einarsson ('88 )
4-3 Björgvin Brimi Andrésson ('90 )
5-3 Alexander Emil Stefánsson ('94 )
Lestu um leikinn

Völsungur 0 - 1 Fylkir
0-1 Guðmundur Tyrfingsson ('29 , víti)
Lestu um leikinn

Njarðvík 0 - 0 Ægir
Rautt spjald: Halldór Geir Heiðarsson, Njarðvík ('85) Lestu um leikinn