"Við erum mjög ánægðir. Þetta var flott frammistaða og sanngjarn sigur. Við erum bara mjög ánægðir með að vera komnir áfram," segir Haukur Páll Sigurðsson, aðstoðarþjálfari Vals, eftir 3-0 sigur gegn FH í Mjólkurbikarnum í kvöld.
Lestu um leikinn: Valur 3 - 0 FH
"Heilt yfir var ég ánægður með spilamennskuna. Við vorum að hreyfa boltann vel og spilamennskan jákvæð í dag."
Mikið hefur verið rætt um gæði leikmanna Vals og að það gæti verið erfitt að koma þeim öllum fyrir í byrjunarliðið. Gylfi Sig, Kristinn Freyr og Aron Jóhannsson byrjuðu til að mynda allir í dag. Haukur segir ekki erfitt að koma þeim öllum fyrir í liðinu.
"Nei og þetta er ekki spurning um að koma neinum fyrir. Við erum með stóran og góðan hóp þar sem allir gera tilkall um að spila og svo er bara valið hverjir byrja. Það eru líka menn á bekknum sem eru klárir að koma inn á. "
Haukur segir engra frétta að vænta af leikmannamálum Vals það sem eftir er af þessum gluggadegi. "Nei. Það held ég alveg örugglega ekki. Nema það hafi þá farið framhjá mér. Þetta er hópurinn sem við erum að vinna með og við erum bara ánægðir með það."
