Jack Clarke búinn í læknisskoðun hjá Ipswich

Búist er við að kantmaðurinn verði tilkynntur sem nýr leikmaður félagsins á næsta sólarhring.

Ipswich borgar 18 milljónir punda fyrir Clarke sem kemur til félagsins úr röðum Sunderland, en Clarke var meðal bestu leikmanna ensku Championship deildarinnar á síðustu leiktíð.

Hann skoraði 15 mörk og gaf 4 stoðsendingar í 40 deildarleikjum og er kominn með mark og stoðsendingu eftir tvær umferðir á nýju tímabili.

Clarke er 23 ára gamall og rennur 25% af upphæðinni sem Ipswich greiðir fyrir leikmanninn í kassann hjá Tottenham eftir að félagið seldi Clarke til Sunderland fyrir tveimur árum síðan.

Clarke er uppalinn hjá Leeds og hóf ferilinn með félaginu áður en hann var fenginn til Tottenham sumarið 2019. Leikmaðurinn lék 6 leiki fyrir U20 landslið Englands en hefur ekki komið við sögu fyrir enskt landslið síðan 2020.