Gestirnir byrjuðu leikinn betur og komust yfir á 5. mínútu þegar Federico Valverde skoraði eftir sendingu frá Karim Benzem. Börsungar voru þó ekki lengi að svara og skoruðu eftir flotta sókn.

Lionel Messi fann þá Jordi Alba sem átti fyrirgjöf á Ansu Fati sem skoraði af stuttu færi og varð um leið sá yngsti sem hefur skorað í El Clasico.

Það var jafn í hálfleik en á 63. mínútu fékk Real Madrid vítaspyrnu. Clement Lenglet togaði þá í Sergio Ramos og skoðaði dómari leiksins atvikið á VAR-skjánum og dæmdi vítaspyrnu í kjölfarið.

Ramos steig á punktinn og skoraði örugglega og kom Real aftur í forystu. Barcelona sótti meira en það var Real sem fékk færin í lokin. Toni Kroos og Sergio Ramos fengu báðir mjög góð færi en Neto í marki Barcelona varði vel.

Á 90. mínútu gulltryggði Luka Modric hins vegar sigurinn. Hann hélt þá ró sinni, fór illa með Neto í markinu og kláraði færið af mikillri yfirvegun.