„Svekktur og við töpum sanngjarnt," sagði Hallgrímur Jónasson þjálfari KA eftir tap liðsins gegn Víkingum á heimavelli í kvöld.
„Við byrjum mjög vel en annan leikinn í röð gefum við mark, það er erfitt að annan leikinn í röð gefum við liðum forystu en það breytir því ekki að þú þarft ekki að tapa 4-0."
Lestu um leikinn: KA 0 - 4 Víkingur R.
Hallgrímur var ósáttur með leik liðsins í heild.
„Við erum að gefa mark annan leikinn í röð, það er bara alltof dýrt. Línurnar þurfa að vinna betur saman, vinna með manninum í kringum þig, við þurfum að gera það betur því pressan er ekki nógu góð hjá okkur."
„Við erum að komast í margar fínar stöður en náum ekki að klára það með marki, náum ekki nógu mörgum skotum miðað við þær stöður sem við komumst í," sagði Hallgrímur.
KA menn ætluðu sér stærri hluti á þessari leiktíð og Hallgrímur biðlar til leikmanna að standa saman.
„Þá er oft auðvelt í hópíþróttum að fara benda á aðra og kenna öðrum um, ég fór yfir það í klefanum áðan að það er ekki að fara gerast, við erum að fara gera þetta saman, líta í eigin barm og gera betur," sagði Hallgrímur.
