Sá leikjahæsti í hópnum framlengir við ÍA

Steinar Þorsteinsson hefur framlengt samning sinn við ÍA og er nú samningsbundinn félaginu út tímabilið 2028. Fyrri samningur hefði runnið út eftir yfirstandandi tímabil.

Í tilkynningu ÍA kemur fram að Steinar sé sá leikjahæsti af núverandi leikmönnum ÍA, en hann hefur leikið 324 leiki fyrir ÍA og skorað í þeim 66 mörk.

Steinar er 28 ára miðjumaður sem getur einnig spilað á kantinum. Hann hefur komið við sögu í ellefu leikjum í Bestu deildinni og byrjað sex þeirra. Hann hefur skorað eitt mark í sumar, eina mark ÍA gegn Blikum í júlí.