Liðið hefur misst þrjá leikmenn sem allir lögðu skóna á hilluna en það eru þeir Matthías Vilhjálmsson og Pablo Punyed ásamt markverðinum Pálma Rafn Arinbjörnssyni.

Fótbolti.net setti saman tvö byrjunarlið skipuð leikmönnum Víkings. Hópnum er skipt upp í A- og B-lið og er það að sjálfsögðu til gamans gert og þarf alls ekki að endurspegla hvernig þjálfararnir líta á stöðu leikmannanna.

Utan hóps eru þekktar stærðir sem hafa komið lítið við sögu sökum meiðsla eða ungs aldurs. Þeir gætu þó flestallir hæglega spilað stóra rullu í liði Víkings í sumar.

Það er vert að nefna að efnilegasti leikmaður Bestu deildarinnar, að mati Fótbolta.net, á síðustu leiktíð, Daði Berg Jónsson, gerir atlögu í bæði lið en hann hefur verið lengi frá vegna þrálátra meiðsla og er því utan hóps.

Ásamt gífurlegri breidd í leikmannahópnum er mögulegt að setja Aron Baldvin Þórðarson sem þjálfara B-liðsins. Hann er efnilegur þjálfari og reyndu ÍBV að fá hann til að taka við liðinu í vetur. Þá er Viktor Bjarki Arnarsson jafnframt aðstoðarþjálfari liðsins og hafði HK áhuga á honum í vetur.

Utan hóps: Daði Berg Jónsson, Davíð Helgi Aronsson, Þorri Ingólfsson, Atli Þór Jónasson, Sveinn Margeir Hauksson og Jochum Magnússon.