Lengjudeildin: Spennandi lokamínútur í fjögurra marka jafntefli

Völsungur og Grótta gerðu 2-2 jafntefli í spennandi leik í Lengjudeild karla á GPG-vellinum á Húsavík í dag.

Húsvíkingar hafa verið að komast á rétta braut í síðustu leikjum og mættu ferskir til leiks. Gestur Aron Sörensson kom Völsungi yfir á 7. mínútu þegar hann stýrði boltanum í netið eftir fyrirgjöf Arnars Pálma Kristjánssonar.

Gróttumenn svöruðu ágætlega og fengu góð færi til að jafna, sérstaklega Björgvin Brimi Andrésson sem slapp í gegn en setti boltann framhjá.

Gestirnir sóttu stíft í upphafi síðari hálfleiks og uppskáru jöfnunarmark þegar laust skot Tristans Freys Ingólfssonar hafnaði í netinu.

Grótta hélt áfram að sækja án afláts en fékk skell þegar um sex mínútur voru eftir. Þá var Tryggvi Grani Jóhannsson tekinn niður í teignum af Guðmundi Rafni Ingasyni, markverði Gróttu.

Elfar Árni Aðalsteinsson kom Völsungi aftur yfir af vítapunktinum en sú forysta entist aðeins í nokkrar mínútur. Mattías Kjeld jafnaði metin skömmu síðar og tryggði Gróttu stig.

Grótta er í 8. sæti með 13 stig en Völsungur situr áfram á botninum með 7 stig.