Ótrúlegar senur þegar markvörðurinn skoraði flautumark sem kom liðinu áfram

Norðmaðurinn Andreas Schjelderup skoraði tvívegis fyrir Benfica sem náði 3-1 forystu í leiknum. Kylian Mbappe skoraði bæði mörk Real Madrid sem lék tveimur mönnum færri síðustu mínúturnar er Raul Asencio og Rodrygo sáu báðir sitt annað gula spjald og þar með rautt.

Á lokasekúndunum vissu Benfica-menn það að markatala gæti skipt sköpum. Mourinho sendi því markvörðinn fram í síðustu sókninni er þeir portúgölsku fengu aukaspyrnu.

Það var því skrifað í skýin að hann myndi skora fjórða mark þeirra sem sendi þá áfram í umspilið. Fredrik Aursnes kom aukaspyrnunni inn á teiginn á Trubin sem stangaði boltanum í netið og 4-2 sigur Benfica staðreynd. Ótrúlegur endir á þessum leik en afar niðurlægjandi fyrir Real Madrid sem þarf að sætta sig við níunda sætið og fer í umspilið.