Gylfi: Eitthvað sérstakt við það

Lykilatriðin sem Víkingar þurfa að hafa á hreinu
„Ég býst ekki við því að þeir breyti því hvernig þeir muni spila mikið. Þeir pressa mikið og eru góðir í því. Þeir eru góðir í fótbolta og vilja spila. Það er fullt af góðum leikmönnum þarna.

Ég held að þetta fari eftir því hvernig okkur tekst að pressa þá, verjast þeim og spila út úr pressunni þeirra. Það er lykilatriði á morgun,“ segir Gylfi aðspurður um hvernig hann heldur að Ísraelarnir komi til leiks.

Skemmtilegra að spila á grasi
Víkingar hafa tekið eina æfingu úti í Ungverjalandi og mun liðið æfa á keppnisvellinum í kvöld. Leikurinn fer fram á grasvelli og segir Gylfi það skemmtilegra að spila á grasi heldur en gervigrasi.

„Ef völlurinn er góður þá er það auðvitað skemmtilegra. Ég held að allir séu vanir því að spila á bæði gervigrasi og venjulegu grasi. Það er eitthvað við það að spila á grasi sem er aðeins skemmtilegra.“

Stórt fyrir framtíð félagsins
Gylfi var spurður út í muninn á leikjum í Bestu deildinni og í Evrópukeppni.

„Það er auðvitað hversu mikið er undir fyrir félagið fjárhagslega. Spennan í kringum leikina, mætingin er reyndar mjög góð í flestum leikjum í deildinni - oftast fullur völlur. En þegar við spilum í Evrópu er alltaf pakkað. Það er örlítið meiri stemning, kvöldleikir á móti alvöru liðum. Það er eitthvað sérstakt við það,“ segir Gylfi og heldur áfram.

„Fyrir klúbbinn er það hversu stórt þetta er fyrir allt félagið og reksturinn næstu ár hjá klúbbnum. Það er eitthvað við það að ná góðum árangri og hjálpa félaginu í því að byggja til framtíðar,“ segir Gylfi að lokum.