Kolbeinn Sigþórsson er á mála hjá AIK og kom hann inn á sem varamaður í markalausu jafntefli í kvöld. Þetta var þriðji leikurinn í röð sem Kolbeinn kemur inn á sem varamaður hjá AIK. Í kvöld lék hann 24 mínútur, á mánudag lék hann hálftíma og fyrir rúmri viku lék hann eina mínútu. Þar áður var landsleikjahlé þar sem hann lék alls 25 mínútur í tveimur innkomum.

Fyrir landsleikjahlé kom hann svo inn á í tveimur leikjum með AIK. Þeir tveir leikir komu eftir tveggja leikja törn þar sem Kolbeinn var ekki í hópnum. Það þarf því að fara tvo mánuði til baka til að finna síðasta byrjunarliðsleik Kolbeins fyrir AIK en hann byrjaði þrjá leiki í röð í seinni hluta ágúst.

Kolbeinn hefur ekki skorað í þrettán deildarleikjum á tímabilinu en hann hefur lagt upp tvö mörk á 511 mínútum. Þegar skoðað er lengra til baka þá kemur í ljós að síðasta mark Kolbeins kom í lokaleik Allsvenskan á síðustu leiktíð, þann 2. nóvember fyrir tæpu ári síðan.