Rodrigo Becao gerði magnað sjálfsmark.

Mynd: EPA

Fallbaráttulið Verona heimsótti Udinese í síðasta leik 20. umferðar efstu deildar ítalska boltans.

Verona tók forystuna snemma leiks þegar Rodrigo Becao skoraði stórbrotið sjálfsmark með skalla við vítateigslínuna. Darko Lazovic lét vaða með skoti utan teigs sem Becao skallaði í loftið en boltinn fór á mikið flug og endaði í netinu með viðkomu í slánni.

Þýska vonarstjarnan Lazar Samardzic jafnaði metin fyrir Udinese á 21. mínútu eftir undirbúning frá Beto.

Heimamenn í Údíne voru með mikla yfirburði en þeim tókst ekki að skora aftur framhjá Lorenzo Montipo'. Lokatölur urðu því 1-1.

Þetta er gríðarlega dýrmætt stig fyrir Verona sem er búið að næla sér í sjö stig úr síðustu fjórum leikjum. Liðið er með 13 stig eftir 20 umferðir - fimm stigum frá öruggu sæti í deildinni. Sampdoria og Cremonese eru í næstu sætum fyrir neðan með 9 og 8 stig.

Sjáðu sjálfsmarkið