SKÝRSLAN: KR kláraði HK/Víking í seinni
Hvað réði úrslitum?
KR voru betri í síðari hálfleiknum. Voru fljótar að koma til baka eftir að hafa lent undir rétt undir lok fyrrihálfleiks og gáfu aldrei eftir. Nánast hver einasti leikmaður spilaði vel í síðari hálfleik og það skilaði sér í dag.
Bestu leikmenn
1. Betsy Doon Hassett
Átti miðjuna í kvöld og var virkilega öflug sóknarlega. Jafnar leikinn í upphafi síðari hálfleiks og leggur upp markið sem kemur KR yfir í 3-2.
2. Gloria Douglas
Margar í KR liðinu sem koma til greina en Gloria var góð í kvöld og gafst aldrei upp í baráttunni uppi á toppi. Skorar markið sem kemur KR yfir 3-2 þegar hún rennitæklar boltann í netið og á svo góða stoðsendingu á Katrínu í markinu sem gerði út um leikinn, 4-2.
Atvikið
Jöfnunarmark Betsy á 50. mínútu leiksins. Mikilvægt fyrir KR að jafna leikinn strax í upphafi síðari hálfleiksins, setti tóninn fyrir það sem koma skyldi.
Hvað þýða úrslitin?
KR fer úr 8. sætinu upp í 5. sæti en HK/Víkingur situr áfram á botni deildarinnar.
Vondur dagur
Það vantaði eitthvað upp á hjá flestum leikmönnum HK/Víking í síðari hálfleik, en það getur ekki talist góður dagur fyrir markmann að fá á sig 4 mörk. Audrey Rose Baldwin fær því þetta sæti. Henni til varnar þá voru aðstæður ekki auðveldar hjá henni í dag og kannski ekki mikið sem hún gat gert til að koma í veg fyrir þessi mörk.
Dómarinn - 7
Lítið hægt að setja út á dómara kvöldsins.