SKÝRSLAN: Fjölnissigur í toppslag
Hvað réði úrslitum?
Yfirvegun og reynsla Fjölnismanna, þeir spiluðu þennan leik mjög vel og eftir að þeir komust yfir var sigurinn eiginlega aldrei í hættu.
Bestu leikmenn
1. Guðmundur Karl Guðmundsson
Tvö mörk og stoðsending í dag og heilt yfir mjög góð frammistaða hjá miðjumanninum.
2. Atli Gunnar Guðmundsson
Atli var öruggur í öllum sínum aðgerðum í dag og átti auk þess nokkrar frábærar vörslur. Hann var svo alveg í vítinu sem var öruggt svo það dregur hann lítið niður. Flottur leikur hjá honum í dag.
Atvikið
Þriðja mark Fjölnismanna, gestirnir höfðu verið að sækja í sig veðrið en Guðmundur Karl slökkti þann vonarneista með flottu marki.
Hvað þýða úrslitin?
Fjölnismenn styrkja stöðu sína á toppnum í Inkasso deildinni en Framarar falla niður í 5. sæti og þurfa að gefa í ef þeir ætla að eiga möguleika á því að fara upp um deild.
Vondur dagur
Hans Viktor Guðmundsson klúðraði tveimur dauðafærum í stöðunni 0-0, það kom ekki að sök þar sem að aðrir leikmenn nýttu sín færi vel. Hans fer sennilega ekki sáttur á koddann samt sem áður.
Dómarinn - 7
Það er erfitt að meta verk dómarans í kvöld án þess að sjá nokkur atriði aftur. Ef að hann náði öllum vafaatriðunum rétt þá er þetta 9 ef ekki þá er þetta 5. Svo við gefum honum þægilega 7 fyrir að hafa fína stjórn á leiknum þar á milli.