SKÝRSLAN: Vinnusigur í Mosfellsbæ
Hvað réði úrslitum?
Þetta var lokaður leikur að mörgu leyti en Afturelding náði inn fyrsta markinu og það reyndist dýrmætt. í heildina sanngjarn sigur þar sem Keflavík tók litla áhættu í leiknum og voru bitlausir fram á við.
Bestu leikmenn
1. Loic Cédric Mbang Ondo
Fyrirliðinn var gríðarlega öflugur í kvöld. Vann mörg návígi og var alltaf réttur maður á réttum stað inn í teig heimamanna. Ondo í þessum ham er einfaldlega frábær leikmaður!
2. Jon Tena Martinez
Spánverjinn stæðilegi í marki Aftureldingar var mjög traustur í kvöld. Greip alla bolta af yfirvegun og varði nokkrum sinnum mjög vel. Virðist ætla að stimpla sig vel inn í liðið.
Atvikið
Markið hans Hafliða í kvöld skildi liðin að og það var svo sannarlega glæsilegt. Fór illa með varnarmann Keflavíkur áður en hann vippaði skemmtilega yfir Sindra í markinu. Jason með góða stoðsendingu.
Hvað þýða úrslitin?
Afturelding fer upp úr fallsæti og ná í þrjú dýrmæt stig. Keflavík fjærlægist toppinn enn frekar og virðist hafa kvatt Pepsi Max drauma sína hér í kvöld.
Vondur dagur
Þetta var vondur dagur fyrir hópinn hjá Aftureldingu. Þrjár skiptingar í fyrri hálfleik hjá heimamönnum sökum meiðsla og nú reynir á breiddina í næstu leikjum.
Dómarinn - 7
Kristinn Friðrik var ágætur í kvöld. Línan pínu skrýtinn í leiknum en annars klikkaði hann ekki á stórum atvikum.