Telma fær treyju Landsliðsmarkvörðurinn Telma Ívarsdóttir fær treyju frá Flosa, formanni knattspyrnudeildar, fyrir leik þar sem hún er búin að ná þeim áfanga að spila 100 leiki fyrir Blika. Til hamingju með það Telma!

Mjög efnilegur leikmaður Á miðjunni hjá Tindastóli er Elísa Bríet Björnsdóttir en hún er fædd árið 2008. Elísa Bríet er afar efnileg og var hún í úrvalsliði 1. umferðar hér á Fótbolta.net.

Upphitun er lokið og það er verið að vökva völlinn. Tíu mínútur í leik, allt að verða klárt fyrir upphafsflaut.

Áslaug Munda mætt Það vekur athygli að það er enginn varamarkvörður á bekknum hjá Blikum og þar eru aðeins sex leikmenn. Þó er þar landsliðskonan Áslaug Munda Gunnlaugsdóttir en hún er mætt aftur heim úr háskólaboltanum. Nik, þjálfari Blika, sagði á dögunum að það væri ólíklegt að Munda myndi spila í sumar vegna höfuðmeiðsla en hún er í hópnum í dag. Athyglisvert.

Frábært veður en lítil mæting Sumarið er farið að láta sjá sig á höfuðborgarsvæðinu. Maður keyrði á völlinn með gluggana niðri. Sólin er farin að skína og hitastigið er í tveggja stafa tölu. Gleðilegt sumar! Aðstæður eru frábærar en það eru því miður innan við 100 manns í stúkunni. Mætingin alveg skelfileg þegar innan við korter í leik.

Ásta Eir í nýju hlutverki Ein af þeim áherslubreytingum sem Nik Chamberlain gerði þegar hann tók við liði Breiðabliks var að gera Ástu Eir Árnadóttur, fyrirliða liðsins, að miðverði.

Ásta Eir hefur verið hægri bakvörður hjá Blikum undanfarin ár en spilaði allan leikinn gegn Keflavík í 1. umferð Bestu-deildarinnar sem miðvörður. Hún byrjar sem miðvörður í dag.

Byrjunarlið Tindastóls Donni gerir einungis eina breytingu frá tapinu gegn FH í fyrstu umferð. Lara Margrét Jónsdóttir byrjar og fer Hugrún Pálsdóttir á bekkinn.

1. Monica Elisabeth Wilhelm (m)
3. Bryndís Rut Haraldsdóttir (f)
6. Laufey Harpa Halldórsdóttir
7. Gabrielle Kristine Johnson
9. María Dögg Jóhannesdóttir
10. Elísa Bríet Björnsdóttir
11. Aldís María Jóhannsdóttir
13. Birgitta Rún Finnbogadóttir
14. Lara Margrét Jónsdóttir
27. Gwendolyn Mummert
30. Jordyn Rhodes

Byrjunarlið Breiðabliks Það eru þrjár breytingar á byrjunarliði Breiðabliks frá síðasta leik gegn Keflavík. Jakobína Hjörvarsdóttir, Hrafnhildur Ása Halldórsdóttir og Birta Georgsdóttir koma inn í byrjunarliðið fyrir Elínu Helenu Karlsdóttur, Margréti Leu Gísladóttur og Edith Kristínu Kristjánsdóttur

12. Telma Ívarsdóttir (m)
2. Jakobína Hjörvarsdóttir
5. Anna Nurmi
7. Agla María Albertsdóttir
8. Heiða Ragney Viðarsdóttir
11. Andrea Rut Bjarnadóttir
13. Ásta Eir Árnadóttir (f)
14. Hrafnhildur Ása Halldórsdóttir
15. Vigdís Lilja Kristjánsdóttir
27. Barbára Sól Gísladóttir
28. Birta Georgsdóttir

Breytt í tígul Síðasta tímabil var erfitt fyrir Breiðablik, þó svo að liðið hafi endað í öðru sæti Bestu deildarinnar. Það voru vonbrigði að ná ekki titlinum af Valskonum. Það voru líka mikil vonbrigði að tapa í bikarúrslitaleiknum gegn Víkingi úr Lengjudeildinni.

Nik Chamberlain tók við liði Blika í vetur eftir að hafa þjálfað lengi Þrótt. Hann kemur inn með nýjar áherslur og verður spennandi að sjá hvernig það fer í sumar.

„Ég held að hópurinn sé ótrúlega sterkur í ár og mín tilfinning er sú að við höfum bætt við okkur mjög góðum leikmönnum," sagði Birta Georgsdóttir, leikmaður Breiðabliks, við Fótbolta.net áður en tímabilið hófst.

„Nik er mjög skýr með það hvað hann vill gera. Hann og Edda (Garðarsdóttir) eru gott teymi og vinna mjög vel saman. Þau eru mjög ólík. Það er fullt af nýjum hlutum sem við erum að gera og læra. Hann er mjög góður þjálfari og er með skýra sýn á hvað hann vill gera," segir Ásta Eir Árnadóttir, fyrirliði Breiðabliks.


Nik er með kerfi sem hann hefur mótað síðustu ár og kemur hann með það inn í Breiðablik: Tígulmiðjan.

„Þetta er kerfi sem hann er greinilega hrifinn af. Ég held að það sé gott fyrir okkur að prófa eitthvað nýtt. Breiðablik hefur örugglega spilað sama kerfið í tíu ár eða eitthvað. Ég held að það sé fínt að læra eitthvað nýtt," segir Ásta og bætti svo við:

„Ég held að hann sé týpan sem við þurftum. Hann segir bara hvernig hlutirnir eru, en er á sama tíma mjög sanngjarn. Þegar hann er ósáttur með eitthvað þá er það rétt og hægt að taka því. Á sama tíma er hann góður þegar við erum að gera vel. Ég fékk góða tilfinningu þegar hann kom."

Það kemur náttúrulega engin í staðinn fyrir Murielle Tiernan Murielle Tiernan yfirgaf í vetur Tindastól eftir að hafa spilað fyrir félagið samfleytt frá 2018. Hún er goðsögn hjá félaginu og skoraði 117 mörk í 129 leikjum.

Í fyrra skoraði hún fjögur mörk í 17 leikjum í Bestu deildinni, en eftir tímabilið ákvað hún að söðla um og ganga í raðir Fram í Lengjudeildinni.


Tindastóll samdi á dögunum við framherjann Jordyn Rhodes frá Bandaríkjunum. Rhodes er gríðarlega öflug og er markahæsti leikmaður í sögu háskólans í Kentucky. Donni, þjálfari Tindastóls, var í viðtali hér á Fótbolta.net á dögunum og var þar spurður að því hvort Rhodes muni fylla beint í skarðið fyrir Murielle.

„Það kemur náttúrulega engin í staðinn fyrir Murielle Tiernan. Ég held að það séu alveg hreinar línur," sagði Donni.

„Hún er alveg einstök í því sem hún hefur gert fyrir félagið. Jordyn er aðeins öðruvísi leikmaður. Spilar svipaða stöðu en ekki alveg sömu stöðu. Hún hentar fullkomlega í það hlutverk sem við ætlum henni. En það kemur engin í staðinn fyrir Murielle."

Það verður spennandi að sjá hvað Jordyn Rhodes gerir í dag, ef hún spilar.


Murielle Tiernan

Diljá spáir í leikina Landsliðskonan Diljá Ýr Zomers - sem hefur verið að gera frábærlega í belgíska boltanum - spáir í leikina sem eru framundan í Bestu deildinni. Þetta hafði hún að segja um leik Breiðabliks og Tindastóls:

Breiðablik 4 - 1 Tindastóll
Breiðablik með góðan sigur í fyrstu umferð og mæta með sjálfstraust í þennan leik! Held að þær verði ekki í neinum vandræðum og vinni þetta örugglega 4-1.


Diljá Ýr Zomers.

Leikurinn átti að fara fram á Sauðárkróki Leikurinn í dag átti upphaflega að fara Sauðárkróki en völlurinn þar er ekki leikhæfur. Því er hann spilaður á Kópavogsvelli.

Fjallað var um málið á Feykir.is. Þar segir: „Í leysingunum síðastliðinn laugardag fór gervigrasvöllurinn glæsilegi á íþróttasvæðinu á Sauðárkróki undir vatn og var völlurinn ekki leikhæfur á sunnudegi."

Gúmmípúðinn undir vellinum er ónýtur og þarf að grípa til aðgerða snögglega.

„Völlurinn er slysahætta eins og hann er í dag," sagði Adam Smári Hermannsson, formaður knattspyrnudeildar Tindastóls, við Feyki.

Viðtöl við leikmenn liðanna fyrir mót Ólöf Sigríður Kristinsdóttir er landsliðskona, nemandi í sálfræði við Harvard og bara einn skemmtilegasti karakter íslenska fótboltans. Olla Sigga, eins og hún er oft kölluð, byrjaði að sparka í bolta í Valsheimilinu á barnsaldri en snemma var fótboltinn settur í fyrsta sæti. Hún lagði mikið á sig til að taka sín fyrstu skref í meistaraflokki og hefur verið mikilvægur leikmaður fyrir Þrótt á síðustu árum. Núna er hún í mætt í Breiðablik og verður spennandi að sjá hvernig það fer hjá henni.



Bryndís Rut Haraldsdóttir er algjör lykilkona fyrir Tindastól. Innan sem utan vallar. Innan hópsins er hún leiðtogi og mikilvægur leikmaður, en utan vallar gengur hún í öll verk fyrir félagið sem henni þykir svo rosalega vænt um. Saga Bryndísar er mjög áhugaverð en hún var á sínum tíma einn efnilegasti markvörður landsins. Draumar um háskólabolta í Bandaríkjunum fjöruðu út þegar hún meiddist en við það mynduðust nýir draumar. Hún er í dag stolt að leiða stelpurnar sínar í Tindastóli út á völlinn í deild þeirra bestu.

Tindastóll tapaði heima Stólarnir hins vegar töpuðu í fyrstu umferð. Þær mættu FH á heimavelli, en það var lítið sem skildi liðin að í þeim leik. Hildigunnur Ýr Benediktsdóttir skoraði eina markið í seinni hálfleiknum.



Stólarnir eru að fara inn í sitt annað tímabil í röð í Bestu deildinni en þeim er spáð áttunda sæti. Fyrirfram reiknar maður kannski við þriggja liða baráttu í kringum fallsvæðið á milli Tindastóls, Fylkis og Keflavíkur.

Sannfærandi byrjun hjá Blikum Breiðablik byrjaði á sannfærandi 3-0 sigri gegn Keflavík á Kópavogsvelli. Vigdís Lilja Kristjánsdóttir fór á kostum í liði Blika og skoraði tvö mörk. Agla María Albertsdóttir gerði þriðja markið og var einnig mjög sterk í leiknum.



Blikum er spáð öðru sæti deildarinnar en það búast flestir við að baráttan um titilinn verði á milli Breiðabliks og Vals.

Góðan daginn! Góðan daginn kæru lesendur og verið velkomin í beina textalýsingu frá leik Breiðabliks og Tindastóls í Bestu deild kvenna. Þetta er leikur sem er í annarri umferð deildarinnar.