Leikurinn fór alla leið í vítaspyrnukeppni þar sem ÍBV hafði að lokum betur.

Andri Þór Grétarsson, markvörður Kórdrengja, meiddist snemma leiks. Hann missteig sig illa á tíundu mínútu leiksins og það þurfti að bera hann af velli.

Kórdrengir voru ekki með varamarkvörð í dag. Sindri Snær Vilhjálmsson kom til félagsins frá Breiðablik í vetur en hann var ekki með í dag vegna meiðsla.

Varnarmaðurinn Ásgeir Frank Ásgeirsson hljóp því í skarðið og var hann í markinu í meira en 100 mínútur. Það er ekki annað hægt að segja en að hann hafi staðið sig vel. Hann varði meira að segja vítaspyrnu í vítaspyrnukeppninni.

Báðir markverðir Kórdrengja eru meiddir en Lengjudeildin hefst í næstu viku. Kórdrengir verða að sækja markvörð áður en deildin hefst en það leit ekki vel út með meiðsli Andra í dag. Hann gæti mögulega verið með slitna hásin.

Hægt er að lesa meira um gang mála í leiknum hérna.