Byrjunarlið Íslands: Rifbeinsbrotinn Gylfi byrjar

Arnar gerir fimm breytingar á liðinu frá 3-0 sigrinum gegn Búlgaríu á Laugardalsvelli um helgina. Gylfi Þór Sigurðsson kemur inn í liðið þrátt fyrir að vera meiddur en hann hefur verið að spila rifbeinsbrotinn í nokkrar vikur núna og spilar með brynju. Hann kemur inn í liðið fyrir Andra Fannar Baldursson sem fær sér sæti á bekknum. 

Varnarlínan hefur tekið á sig allt aðra mynd en í síðasta leik en Daníel Leó Grétarsson, Stefán Teitur Þórðarson og Guðlaugur Victor Pálsson koma allir inn í liðið en Daníel Leó sem hefur verið að spila miðvörð færist yfir í vinstri bakvörðinn. Aron Einar Gunnarsson, sem spilaði miðvörð í síðasta leik, þarf að sætta sig við bekkjarsetu í dag. 

Andri Lucas Guðjohnsen snýr þá aftur í liðið eftir að hafa fengið að hvíla í fyrri hálfleik gegn Búlgaríu. Mikael Neville Anderson, sem fékk mikið lof fyrir sína frammistöðu í bakverðinum í síðasta leik heldur sæti sínu í liðinu en stígur upp á hægri kantinn þar sem Arnór Sigurðsson spilaði í síðasta leik en hann kemur út úr liðinu. 

Mikael Egill Ellertsson, sem spilaði vinstri bakvörð gegn Búlgaríu, fékk gult spjald í síðasta leik og tekur því út leikbann í dag. Jón Dagur sem spilaði vinstra megin með honum er svo sá síðasti sem kemur út úr liðinu. 

Mynd: Kári Snorrason