Rúnar Kristinsson
Kjartan verður frá í einhverjar vikur.
„Ég met þetta eins og leikina hingað til í Reykjavíkurmótinu, mjög góð æfing. Við fengum hörkugott Fram lið á móti okkur, þeir voru sprækir og flottir og ofsalega vel skipulagt lið. Það er búið að vera mjög gaman að fylgjast með þeim síðustu tvö ár, Jón (þjálfari Fram) er að gera frábæra hluti og bara mjög erfiður leikur," sagði Rúnar Kristinsson, þjálfari KR, eftir 1-3 sigur gegn Fram í Reykjavíkurmótinu.
Úrslitin þýða að KR mun mæta Val í úrslitaleik mótsins á sunnudag. Fram hins vegar mætir Víkingi í leiknum um 3. sætið.
Úrslitin þýða að KR mun mæta Val í úrslitaleik mótsins á sunnudag. Fram hins vegar mætir Víkingi í leiknum um 3. sætið.
„Það er erfitt að spila inni, það eru orðin einhver ár síðan við spiluðum hérna," saðgi Rúnar og glotti, „Og sem betur fer, hrós til þeirra sem sjá um að halda utan um þetta mót að völlurinn er blautur og fínn, betra að spila fótbolta og minni slysahætta. Ég er heilt yfir ánægður að vinna og sleppa við alvarleg meiðsl."
Atli Sigurjónsson og Kristján Flóki Finnbogason fóru af velli vegna meiðsla í fyrri hálfleik. Hversu alvarleg eru þau meiðsl?
„Ekki mjög, Flóki fékk smá tak í bakið, það gerðist í raun í upphitun og svo ágerðist það bara þegar leið á leikinn. Þetta var kannski ekki vellinum að kenna eða neinu slíku. Atli sneri sig örlítið á ökklanum þegar hann ætlaði að stíga til jarðar. Bara óheppni og ekkert alvarlegt."
Rúnar gagnrýndi það harðlega árið 2020 að spilað væri á gervigrasinu í Egilshöll. Rúnar var í eftirminnilegu viðtali eftir bikarleik gegn Vængjum Júpíters í júní 2020. Þá hafði Gunnar Þór Gunnarsson meiðst illa í leiknum sem spilaður var í Egilshöll.
„Við erum að horfa upp á Gunnar vera klára ferilinn sinn hér vegna hnémeiðsla sem má rekja til gervigrassins hérna. Ég er ekki að álasa Vængjum Júpíters á neinn hátt heldur knattspyrnusambandinu. Það er óboðlegt að spila hér inni í 32-liða úrslitum á þessu gervigrasi. Annar leikmaðurinn minn á þessu ári sem eyðileggur á sér hnéð hérna," sagði Rúnar í viðtalinu sem má nálgast með því að smella hér.
En aftur að leiknum í kvöld. Er grasið betra en það hefur verið?
„Já, ef það er blautt þá er það miklu, miklu betra en samt alltaf öðruvísi að spila inni. En hrós til þeirra sem hafa allavega hlustað á okkur sem hafa kvartað yfir þessu og að hafa grasið blautt er besta mögulega aðstaðan hér inni."
Kjartan Henry Finnbogason lék ekki með KR í dag og verður ekki með í leiknum gegn Val á sunnudag. „Kjartan er ekki í 100% standi, hann er slæmur í nára, það er verið að skoða það. Það eru einhverjar vikur í hann," sagði Rúnar.
Viðtalið við Rúnar Kristinsson er talsvert lengra og má nálgast það í heild í spilaranum að ofan. Þar ræðir hann um fyrirkomulagið á Reykjavíkurmótinu og þann ókost að ekki megi spila leikmönnum sem ekki eru komnir með leikheimild. Þá ræddi hann einnig um Hall Hansson, Finn Tómas Pálmason og Sigurð Bjart Hallsson.
