Var nálægt því að taka skóna af hillunni

Ben Arfa, sem er 39 ára gamall, hefur ekki spilað atvinnumannafótbolta í fjögur ár eða síðan hann var rekinn frá Lille í heimalandinu.

Frakkinn er eitt mesta hæfileikabúnt sem komið hefur fram í frönskum fótbolta, en skapgerð og agavandamál urðu honum oft að falli og komu í veg fyrir að ferillinn yrði jafn stór og hæfileikarnir gáfu tilefni til.

Ben Arfa lék meðal annars með Lyon, Newcastle United, Nice, Lille, Rennes og Paris Saint-Germain á ferlinum. Hæfileikarnir voru aldrei dregnir í efa, en ágreiningur og vandræði fylgdu honum víða.

Eftir að hann var rekinn frá Lille tilkynnti hann aldrei formlega að hann væri hættur í fótbolta, en það þótti nokkuð augljóst enda sneri hann sér að padel þar sem hann er sagður vera í fremstu röð í Frakklandi.

Nice-Matin greinir nú frá því að Ben Arfa hafi verið ótrúlega nálægt því að taka skóna aftur fram í byrjun árs. Jean-Pierre Rivere sneri þá aftur til Nice sem varaforseti og reyndi að fá Ben Arfa aftur til félagsins.

Þeir tveir eru í góðu sambandi eftir að Ben Arfa lék með Nice tímabilið 2015-2016 og skoraði þá átján mörk.

Ben Arfa var opinn fyrir því að snúa aftur á völlinn, en Claude Puel, þjálfari Nice, var fyrst mótfallinn hugmyndinni. Hann samþykkti hana þó að lokum með því skilyrði að Ben Arfa myndi annað hvort hefja æfingar í París til að komast aftur í takt eða æfa með unglingaliði Nice.

Það leist Ben Arfa alls ekki á og varð því ekkert af endurkomunni.

Svekkjandi tíðindi, þá sérstaklega fyrir eldri kynslóðina sem hefði eflaust viljað fá að sjá hann leika listir sínar að minnsta kosti einu sinni enn.