UTAN VALLAR: 75% af tekjum Fram fóru í laun

Greinin var einnig birt á utanvallar.is

Rekstrartekjur Fram voru 250,2 milljónir króna árið 2025 en þær lækkuðu um ríflega 24,7 milljónir króna á milli ára. Það skal þó hafa í huga að Fram fékk ríkulegan arf í fyrra frá Halldór B. Jónssyni, fyrrum formanni félagsins. Stærsti hluti tekna Fram eru vegna útsendingarréttar og styrkja frá KSÍ sem námu 94,7 milljónum króna á síðasta ári. Fast á hæla þess tekjuliðar kemur tekjuliðurinn Framlög og styrkir en þar voru ríflega 94 milljónir króna tekjufærðar. Þessi tekjuliður hækkaði um 65,8 milljónir króna á milli ára. Þá voru tekjur Fram vegna sölu leikmanna í kringum 25 milljónir króna á síðasta ári.

Rekstrargjöld Fram voru 242,5 milljónir króna á síðasta ári og hækkuðu um hátt í 43 milljónir króna á milli ára, eða tæplega 21,5%. Langstærsti útgjaldaliður Fram eru laun og launatengd gjöld sem voru 188,4 milljónir króna eða 77,7% af útgjöldum Fram á síðasta ári.

Í skýringum ársreikningsins má finna sundurliðun á launagreiðslunum og þar má sjá að verktakagreiðslur eru stærsti einstaki liður, tæplega 76 milljónir króna. Hins vegar eru laun og launatengd gjöld samanlagt ríflega 65 milljónir króna.

Ef litið er á launahlutfall má sjá að það hækkaði 15,7 prósentustig á milli ára og var 75,3% í árslok 2025. Síðustu fimm árin hefur launahlutfallið að meðaltali verið 78,1% og er það í raun árið 2024 sem sker sig úr frá restinni þegar það lækkaði nokkuð hressilega, þökk sé arfinum góða.

Ef leikmannasölur og fjármagnsliðir eru teknir út fyrir sviga, þá hefur uppsöfnuð rekstrarafkoma Fram verið jákvæð um 2 milljónir krónur síðustu fimm árin. Heilt yfir hefur hins vegar afkoma Fram verið jákvæð um 83 milljónir krónur síðustu fimm árin.

Eignir Fram stóðu í 104,8 milljónum króna á síðasta ári, en þær lækkuðu um tæplega 9 milljónir króna á milli ára. Stærsta eign Fram eru viðskiptakröfur sem voru 53 milljónir króna, tæplega helmingur eigna Fram. Þar á eftir er handbært fé næststærsta eign Fram og var 44,6 milljónir króna í árslok 2025. Í sjóðstreymisyfirlitinu má sjá að mestu munar um veltufé frá rekstri á milli ára, enda var mikill hagnaður af rekstrinum árið 2024. Handbært fé Fram lækkaði því um 41,4 milljónir króna árið 2025.

Ef litið er á veltufjárhlutfall Fram má sjá að það var 610,3% í árslok 2025 og hækkaði um 311,8 prósentustig á milli ára. Eignastaða Fram eru orðin verulega sterk.

Skuldir Fram stóðu í 16,3 milljónum króna í árslok 2025 og lækkuðu um tæplega 20 milljónir króna á milli ára. Mestu munaði um skuldir við tengda aðila á milli ára en sú skuld stóð í 25 milljónum króna árið 2024 en var búin að þurrkast út í árslok 2025. Hins vegar hækkuðu viðskiptaskuldir um 131,1% á milli ára.

Þá var skuldahlutfall Fram 15,5% í árslok 2025 og lækkaði um 16,2 prósentustig á milli ára. Síðustu fimm árin hefur skuldahlutfallið að meðaltali verið 50,4%.

Eigið fé Fram skaust allrækilega upp árið 2024 þökk sé góðri rekstrarafkomu. Í árslok 2025 var eigið fé Fram 88,5 milljónir króna og hækkaði um 10,6 milljónir króna á milli ára.