Sigríður Theódóra Guðmundsdóttir skoraði sitt annað mark í sumar þegar Þróttur vann sannfærandi 3-0 sigur á Fram á Lambhagavelli í dag.
Hún var ánægð með úrslitin eftir erfiðan leik.
„Auðvitað bara mjög gott að ná í þrjú stig hérna. Þetta var rosalega erfiður leikur á móti bara góðu liði og við áttum í erfiðleikum mjög lengi. Það er bara gott að ná í þessi þrjú stig.“
Lestu um leikinn: Fram 0 - 3 Þróttur R.
Sigríður er komin vel af stað í sumar og hefur nú skorað í tveimur leikjum í röð. Hún skrifaði nýverið undir nýjan samning við Þrótt og segir ákvörðunina hafa verið augljósa.
„Já það er bara æðislegt að vera í Laugardalnum. Það var aldrei spurning um annað en að vera þar áfram, þannig mér líður mjög vel.“
Hún viðurkennir að stöðugleiki hafi verið áskorun en vonast til að hafa fundið taktinn.
„Það setur það auðvitað vel en maður þarf bara að halda áfram og reyna að halda stöðugleika. Það er eitthvað sem mig hefur vantað í svolítið langan tíma. Ég hef ekkert beint verið að finna stöðugleikann þannig að vonandi er ég bara byrjuð að finna hann.“
Markmiðin eru þó einföld.
„Svo lengi sem ég er að hjálpa liðinu að vinna þá er ég bara mjög ánægð.“
Sjáðu viðtalið í heild í spilaranum hér að ofan.
