Stjórnendur AZ eru afar ósáttir með hegðun þjálfarans, sem bjóst við að klára tímabilið við stjórnvölinn hjá skemmtilegu liði AZ sem er enn taplaust í deildinni og búið að vinna fjóra leiki í röð.

Slot hefur gert frábæra hluti með AZ, sérstaklega í Evrópudeildinni þar sem liðið er í frábærri stöðu fyrir lokaumferð riðlakeppnina. AZ lenti í dauðariðli með Napoli og Real Sociedad en sigur í lokaumferðinni gegn króatíska botnliðinu Rijeka tryggir liðinu þátttöku í 16-liða úrslitum.

Slot er kominn langt í samningsviðræðum við Feyenoord og mun að öllum líkindum taka við félaginu á næstu leiktíð.

AZ spilaði stórskemmtilegan bolta á síðustu leiktíð og endaði í öðru sæti, jafnt toppliði Ajax á stigum þegar tímabilið var blásið af vegna Covid.

Albert Guðmundsson fékk lítinn sem engan spiltíma undir stjórn Slot á síðustu leiktíð en er kominn með 3 mörk í 7 deildarleikjum í haust. Það verður áhugavert að sjá hvernig honum tekst að fóta sig undir nýjum þjálfara.