Ítalía: Ronaldo byrjaði á bekknum í sigri á Lazio

Meistarar Juventus komu vel til baka í ítölsku úrvalsdeildinni í kvöld er liðið spilaði við Lazio á heimavelli sínum, Allianz Stadium.

Juventus byrjaði ansi illa en eftir 14 mínútur var staðan orðin 1-0 fyrir Lazio. Joaquin Correa sá um að koma boltanum í netið.

Cristiano Ronaldo byrjaði leikinn á varamannabekk Juventus sem tókst að jafna metin á 39. mínútu með marki Adrian Rabiot.

Alvaro Morata var í fremstu víglínu hjá Juventus og skoraði hann svo tvö mörk í seinni hálfleik til að tryggja sigur.

Fyrra mark Morata kom á 57. mínútu og það seinna þremur mínútum síðar af vítapunktinum.

Sigurinn er stór fyrir Juve sem er nú í þriðja sæti deildarinnar, sjö stigum á eftir toppliði Inter Milan.

Þess má geta að Ronaldo kom við sögu þegar 20 mínútur lifðu leiks.