„Það gerist ekki betra en þetta: Að skora mark í lokin eftir að hafa verið 2-0 undir í hálfleik. Við misstum aldrei trú í hálfleik, við höfðum allir trú á að við værum að fara koma til baka,“ sagði Amin Cosic, leikmaður KR, eftir sigur liðsins á Stjörnunni í kvöld.
Lestu um leikinn: Stjarnan 2 - 3 KR
Geggjað að vera í KR
Hversu sætt var að sjá Ástbjörn skora sigurmarkið?
„Þetta var geggjuð tilfinning. Vel spilað hjá Aroni á mig og ég tek hlaupið. Tengingin sem við erum búnir að búa til síðan ég kom er góð. Geggjað að sjá Ástbjörn skora, hann er búinn að vera sjóðheitur.“
Hversu gaman er að vera í KR núna?
„Það er geggjað að vera í KR. Geggjað að spila þessa leiki, nammi fyrir alla framherja að spila svona fótbolta.“
Tekið stór skref
Amin hefur byrjað tímabilið frábærlega og tekið stór skref fram á við frá því í fyrra. Hann var spurður um muninn frá síðasta tímabili.
„Ég reif mig í gang og byrjaði að fara meira í ræktina og hlustaði meira á hvað þjálfararnir vildu frá mér. Þegar ég kom hélt ég að ég yrði alltaf í byrjunarliðinu og þyrfti ekki að verjast. En þegar þetta kemur inn, spilar hundrað prósent varnarleik á æfingum og ferð í ræktina verðuru miklu betri leikmaður.
Undirbúningstímabilið er 6-7 mánuðir, þú hefur hellings tíma til að bæta þig. Ég held að ég sé búinn að sýna núna hvað ég get. Ég held að ég eigi þetta skilið, er búinn að leggja mikið á mig eins og liðið allt.“
Viðtalið má sjá í heild sinni í spilaranum hér að ofan.
