Óskar Borgþórsson átti stórleik þegar Víkingur valtaði yfir Þór, 6-0, í 6. umferð Bestu deildarinnar í kvöld. Óskar skoraði tvö mörk og lagði upp tvö til viðbótar í algjörri markaveislu á Víkingsvellinum.
„Bara ótrúlega góð, við erum mjög sáttir með þennan sigur. 6-0 gerist ekki betra, halda hreinu, bara geggjað,“ svaraði Óskar Borgþórsson um viðbrögð eftir leik.
Lestu um leikinn: Víkingur R. 6 - 0 Þór
Óskar var eðlilega sáttur með eigin frammistöðu.
„Þetta var ekkert eðlilega gaman á svona kvöldum, þegar maður er einhver veginn bara locked in. Skora tvö og tvö assist, það er bara ekkert betra sko.“
„Þetta er bara statement inn í deildina, sýna að við getum unnið alla, bara 6-0, getum haldið hreinu og skorað eins mikið og við viljum.“
Víkingur gerði sjö breytingar á byrjunarliðinu frá síðasta leik en það virtist ekki hafa nein áhrif á spilamennskuna.
„Já bara mjög vel syncaðir og með geggjaðan hóp. Allir vita sín hlutverk og við erum að nýta allan hópinn sem við höfum.“
Næsti leikur í deildinni er útileikur gegn ÍBV í Vestmannaeyjum og Óskar býst við erfiðu verkefni þar.
„Bara hörkuleik. Það verður erfitt að fara til Vestmannaeyja. Ég veit ekkert hvort við förum með þyrlu, skipi, flugvél eða hvort við syndum eða eitthvað. En við ætlum að fara þangað, vinna og berjast. Það er það sem maður þarf að gera til að vinna í Vestmannaeyjum.“
Óskar fékk að leik lokum góðar móttökur frá ungum stuðningsmönnum Víkings sem fylgdu honum um völlinn og sungu hástöfum.
Þú getur séð viðtalið í heild og ungu aðdáendurna í spilaranum hér að ofan.
