Sölvi eftir 6-0 sýningu: Alltof góðir leikmenn á bekknum
Sölvi segir samkeppnina innan hópsins ýta undir frammistöðu leikmanna.
Mynd: Fótbolti.net - Hafliði Breiðfjörð
Sölvi segir samkeppnina innan hópsins ýta undir frammistöðu leikmanna.
Mynd: Fótbolti.net - Hafliði Breiðfjörð
Víkingur valtaði yfir Þór, 6-0, í 6. umferð Bestu deildarinnar í kvöld og var þjálfarinn Sölvi Geir Ottesen afar sáttur með frammistöðu sinna manna.
„Bara mjög góð. Við þurftum alveg að hafa fyrir þessu en við vorum bara virkilega góðir í dag. Létum boltann ganga hratt, mikið af hreyfingum og horfum fram á við. Þannig ég er bara virkilega sáttur með þennan sigur.“
„Það er rosalega auðvelt að koma út í seinni hálfleikinn og finnast eins og verkið sé klárað en þeir komu flottir út í seinni hálfleik líka. Ég er sérstaklega ánægður með það. Við héldum áfram að berja á þeim og spila hraðan fótbolta.“
„Þarft að vera með þetta mindset, getur ekkert verið að gefa eftir þótt staðan sé svona. Sama hvort þú sért 4-0 undir eða 4-0 yfir.“
Sölvi gerði sjö breytingar á byrjunarliðinu frá síðasta leik, nokkrar vegna meiðsla en hann segir hópinn einfaldlega mjög sterkan.
„Vissulega er þetta lúxus vandamál að vera með marga góða leikmenn í stórum hóp. Maður hugsar oft að það eru alltof góðir leikmenn á bekknum eða jafnvel utan hóps.“
Víkingur ætlar sér stóra hluti á tímabilinu.
„Við ætlum okkur langt í öllum keppnum, við ætlum að reyna við báða titlana heima og ná langt í Evrópu.“
„Elías er búinn að vera heitur undanfarið, iðinn við kolann fyrir framan markið og Óskar stóð sig hrikalega vel í dag.“
„Þetta var massíf liðsframmistaða í dag og þá er þjálfarinn yfirleitt sáttastur.“
Sjáðu viðtalið í heild í spilaranum hér að ofan.
