FH vann sterkan 2-1 útisigur á Stjörnunni á Samsungvellinum í 4. umferð Bestu deildarinnar í dag. Guðni Eiríksson, þjálfari FH, var ánægður með bæði úrslitin og framlag leikmanna af bekknum.
„Bara ánægður, ánægður að koma á erfiðan útivöll og sækja þrjú stig. Ánægður með að tengja sigra. Ánægður með á löngum köflum frammistöðu leikmanna. Þannig bara sáttur í dag.“
Lestu um leikinn: Stjarnan 1 - 2 FH
Annað mark FH kom strax í kjölfar skiptingar hjá Guðna og komu varamennirnir Berglind Freyja, Elín Björg og Hafrún Birna allar að markinu. Frábær skipting sem skilaði marki
„Já og þetta er það sem að FH liðið hefur fram yfir mörg önnur lið í dag í Bestu deildinni. Við erum með breiðan hóp og við nýtum hópinn.“
„Það sýndi sig í dag að þær sem koma inn á hafa tilgang og breyta leiknum. Það var bara algjört skólabókadæmi um að nýta breidd.“
Guðni ræddi einnig áskoranirnar sem fylgja stórum hópi og gagnrýndi fyrirkomulagið í kringum venslalið.
„Já ég gæti rætt heillengi við þig um hvernig maður myndi vilja sjá apparatið virka hjá KSÍ varðandi þessi venslalið.“
„Ég meina hvað erum við að gera, við eigum að vera að móta og búa til leikmenn og það er rosalega erfitt í þessu umhverfi sem að okkur er boðið upp á í dag.“
„Við erum að reyna að búa til verkefni sjálf fyrst það er ekki í boði að gera það á þann hátt sem maður myndi vilja sjálfur.“
„Hausverkur nei, þetta er jákvætt. Það er spilað þétt og breidd skiptir miklu máli.“
Katla María fór sárþjáð af velli í fyrri hálfleik.
„Þetta er klárlega hnéið á henni, ég veit það ekki. Ég vona það svo innilega að það sé ekki krossband.“
„Ég ætla ekki að mála skrattann á vegginn en maður er alltaf hræddur þegar um hnémeiðsl er að ræða.“
Næsti leikur FH verður gegn Selfossi á útivelli í Mjólkurbikarnum, hverig leggst það í hann?
„Bara vel, alltaf gaman að mæta liði sem maður er alla jafna ekki að spila við. Bara verðugt verkefni.“
Sjáðu viðtalið í heild í spilaranum hér að ofan.
