Jón Ólafur Daníelsson var kátur eftir sigur ÍBV á heimavelli gegn Þór/KA í dag en nýliðarnir frá Vestmannaeyjum eru óvænt með fullt hús stiga eftir fjórar fyrstu umferðir tímabilsins í Bestu deildinni.
Lestu um leikinn: ÍBV 2 - 0 Þór/KA
ÍBV vann 2-0 eftir nokkuð jafnan leik og segir Jón Óli að markmiðið sé að berjast um þrjú efstu sæti deildarinnar.
„Ég finn fyrir miklu þakklæti til leikmanna hvernig þeir spiluðu leikinn og héldu skipulagi af mikilli fagmennsku. Ég var reyndar mjög ósáttur með fyrstu 20 mínúturnar þegar sóknarmennirnir mínir brenndu af hverju færinu fætur öðru og mér fannst þær bara ekki vera að bera virðingu fyrir marktækifærunum. Þær héldu örugglega að þetta yrði svona partý allan leikinn en við vitum öll að það er ekki þannig. Ég var bara að bíða eftir að fá mark í bakið en sem betur fer gerðist það ekki í dag," sagði Jón Óli eftir lokaflautið. „Það var hálffyndið að það voru svo Akureyringarnir sem skoruðu fyrsta markið fyrir okkur.
„Þetta kemur mér þónokkuð á óvart útaf því að við höfum verið án Helenar Heklu og Fridrikku. Með fullmannað byrjunarlið ætla ég að berjast um þrjú efstu sætin en þetta hefur gengið ótrúlega og þessar ungu stúlkur sem koma inn eru virkilega að vinna vinnuna sína."
Jón Óli staðfestir að Fridrikka Marie Clementsen verður frá í 6-12 vikur og mun því snúa aftur á völlinn seinna í sumar ef bataferlið gengur að óskum.
Þá fór Allison Grace Lowrey meidd af velli í sigrinum gegn Þór/KA en hún er búin að skora fjögur mörk í fjórum fyrstu umferðum tímabilsins.
„Framherjinn okkar (Allison) á það til að stífna eitthvað upp aftan í læri og upp í rassgat og ég eiginlega veit ekki hvað skal segja, við þurfum að finna einhvern til að nudda á henni rassgatið til að fá hana í lag. Það er einhver stífleiki sem gerir vart við sig hjá henni, yfirleitt er það eftir kannski 70 mínútna leik en það gerðist snemma í dag."
