Girona hefur ekki átt góðu gengi að fagna og er spútnik lið síðasta tímabils í spænsku deildinni aðeins komið með þrjú stig í frumraun sinni í Meistaradeildinni, eftir fjóra tapleiki og einn sigur.

Atalanta mætir svo Real Madrid í stórleik í kvöld, þar sem ríkjandi Evrópudeildarmeistarar mæta sigurvegurum Meistaradeildarinnar frá því í fyrra. Úrslitaleikur Ofurbikars Evrópu er því endurtekinn í kvöld en í þeirri viðureign hafði Real Madrid betur með tveimur mörkum gegn engu.

Liðin hafa mæst þrisvar sinnum í sögunni og alltaf hafa Madrídingar haft betur, en þessi viðureign í kvöld er gríðarlega mikilvæg fyrir stjörnum prýtt lið Real Madrid sem er aðeins búið að safna sér 6 stigum eftir 5 umferðir. Atalanta hefur gengið betur og eru Ítalirnir í fimmta sæti sem stendur - enn taplausir og með 11 stig.

Þýskalandsmeistarar Bayer Leverkusen mæta á sama tíma Ítalíumeisturum Inter í stórleik en bæði lið hafa farið vel af stað í Meistaradeildinni í haust.

Inter hefur enn ekki fengið mark á sig í Meistaradeildinni og er í öðru sæti með 13 stig, þremur stigum meira heldur en Leverkusen.

PSG heimsækir Salzburg og þarf sigur í Austurríki eftir hörmulega byrjun í Meistaradeildinni, en franska stórveldið er aðeins komið með 4 stig.

RB Leipzig, sem er óvænt án stiga, tekur svo á móti Aston Villa á meðan FC Bayern heimsækir Shakhtar Donetsk.

Leikir dagsins
17:45 Dinamo Zagreb - Celtic
17:45 Girona - Liverpool
20:00 Atalanta - Real Madrid
20:00 Leverkusen - Inter
20:00 Brest - PSV
20:00 Club Brugge - Sporting
20:00 Salzburg - PSG
20:00 RB Leipzig - Aston Villa
20:00 Shakhtar D - Bayern