Kórdrengir 2 - 4 FH
1-0 Gunnlaugur Fannar Guðmundsson ('7)
1-1 Steven Lennon ('26)
2-1 Sverrir Páll Hjaltested ('29)
2-2 Steven Lennon ('33, víti)
2-3 Steven Lennon ('42)
2-4 Kristinn Freyr Sigurðsson ('54)
Lestu um leikinn: Kórdrengir 2 - 4 FH
Kórdrengir tóku á móti FH í hörkuslag í Mjólkurbikarnum og náðu forystunni snemma leiks þegar boltinn datt fyrir Gunnlaug Fannar Guðmundsson í kjölfar aukaspyrnu.
FH tók algjöra stjórn á leiknum eftir markið og sótti stíft. Steven Lennon jafnaði leikinn eftir mistök í vörn Kórdrengja sem var ekki tilbúin í slagin eftir snöggt innkast FH-inga. Oliver Heiðarsson gaf fastan bolta fyrir markið og mistókst Óskari Sigþórssyni að handsama boltann. Þess í stað missti hann boltann úr greipum sér og skoraði Lennon í autt markið.
Það tók Kórdrengi aðeins þrjár mínútur að endurheimta forystuna. Ólafur Guðmundsson missti boltann klaufalega í vörn og gerði Sverrir Páll Hjaltested vel að spretta upp og klára einn gegn markmanni.
Það var gífurlegur hasar á Framvelli og voru Hafnfirðingar búnir að jafna leikinn á ný skömmu síðar. Gunnlaugur Fannar braut þá á Birni Daníeli Sverrissyni innan vítateigs og skoraði Lennon af vítapunktinum. Staðan orðin 2-2 eftir rétt rúmlega hálftímaleik og átti Steven Lennon eftir að fullkomna þrennuna fyrir leikhlé.
Lennon fékk þá boltann frá Kristni Frey Sigurðssyni sem missteig sig og gaf óvart stoðsendingu. Staðan 2-3 eftir afar fjörugan fyrri hálfleik.
Kristinn Freyr skoraði fjórða mark FH í upphafi síðari hálfleiks og róaðist leikurinn aðeins niður í kjölfarið. Kórdrengir komust þó nálægt því að minnka muninn og var Lennon næstum búinn að skora sitt fjórða mark.
Undir lokin komu Kórdrengir boltanum í netið en ekki dæmt gilt vegna brots á markverði FH í aðdragandanum. Það voru Kórdrengir ósáttir með en lokatölur urðu 2-4 og er FH komið í undanúrslit Mjólkurbikarsins ásamt KA.
