England: Ótrúleg dramatík í jafntefli Brentford og Chelsea

Það var dramatík þegar Brentford og Chelsea skildu jöfn í síðasta leik dagsins í úrvalsdeildinni.

Fyrri hálfleikurinn byrjaði rólega en eftir 35 mínútna leik brutu Brentford ísinn. Jordan Henderson átti frábæra sendingu fram völlinn á Kevin Schade sem komst í gegn og skoraði örugglega framhjá Robert Sanchez.

Chelsea fékk sitt besta færi í fyrri hálfleik undir lokin þegar Caoimhin Kelleher varði vel frá Enzo Fernandez.

Cole Palmer er búinn að jafna sig af meiðslum en hann kom inn á snemma í seinni hálfleik. Hann var ekki lengi að stimpla sig inn, fimm mínútum eftir að hann kom inn á skallaði Joao Pedro boltanum fyrir fætur Palmer sem skoraði og jafnaði metin fyrir Chelsea.

Alejandro Garnacho kom inn á þegar tíu mínútur voru til loka venjulegs leiktíma í sínum fyrsta leik fyrir Chelsea. Hann átti sendingu fyrir en Brentford kom boltanum frá.

Boltinn fór beint til Moises Caicedo sem negldi boltanum í netið og kom Chelsea yfir.

Fabio Carvalho kom inn á lokamínútu venjulegs leiktíma. Sex mínútum var bætt við og í uppbótatímanum skoraði Carvalho eftir langt innkast og tryggði Brentford dramatískt jafntefli.