Andri Fannar Baldursson, leikmaður Bologna, var gestur í hlaðvarpsþættinum Ungstirnin á Fótbolta.net í gær. Andri Fannar spilaði sjö leiki í Serie A á nýliðnu tímabili en hann var svekktur að fá ekki að spila gegn ítölsku meisturunum í Juventus í júní.
„Þetta var fyrsti leikur eftir þessa löngu Covid pásu. Ég hafði undirbúið mig mjög lengi fyrir þennan leik. Juventus er risastórt lið og það er draumur allra að spila á móti þessu liði," sagði Andri Fannar.
„Þetta eru gæar sem þú hefur fylgst með síðan þú varst pínulítill í sjónvarpinu og tölvuleikjum. Þegar við erum að labba inn í klefa eftir upphitun er Ronaldo einum metra frá mér. Ég verð svolítið lítill í mér."
„Þegar leikurinn byrjaði fór ég að hita upp. Þá er ég að hita upp við hliðina á Douglas Costa, Aaron Ramsey, Matuidi og svona nöfnum. Ég beið eftir tækifærinu að koma inn á en það kom ekki þennan daginn."
„Ég viðurkenni að ég var pirraður í 2-3 daga eftir þetta og vildi helst ekki tala við neinn. Ég mæti ákveðinn á æfingar og notaði reiðina á æfingum. Ég sýndi að ég vildi fá mínútur og væri klár í tækifærið og það kom að lokum."
Andri Fannar er í sumarfríi á Íslandi til 23. ágúst en þá hefst nýtt undirbúningstímabil með Bologna.
„Við förum upp í fjöll í eina viku í æfingabúðir og gerum okkur klára í næsta tímabil sem hefst í september. Það er svo heitt á Ítalíu að við förum upp í fjöll þar sem er kaldara og við getum æft betur," sagði Andri Fannar.
Hér að neðan má hlusta á þáttinn í heild. Viðtalið við Andra hefst eftir 44 mínútur.
Athugasemdir