Vestri tapaði gegn KA á Akureyri í dag í lokaumferðinni fyrir tvískiptingu deildarinnar. Fótbolti.net ræddi við Davíð Smára Lamude, þjálfara Vestra, eftir leikinn.
Lestu um leikinn: KA 4 - 1 Vestri
„Tilfinningin er klárlega ekki góð, það skiptir máli hvernig þú tapar. Heilt yfir fannst mér Vestra liðið gott í fyrri hálfleik og fyrstu tíu mínúturnar í seinni hálfleik. Við björgum á línu og skorum strax í kjölfarið, mér fannst leikurinn vera snúast okkur í vil," sagði Davíð.
„Við urðum kærulausir og slitnir. Við hleyptum þessu upp í hálfgerðan 'ping pong' leik. Fórum í langa bolta án þess að liðið væri klárt í að vinna seinni boltann. Ósáttur með að við skulum gleyma fyrir hvað við stöndum og að við höfum unnið okkur inn ákveðna virðingu. Við vorum að tapa mikið af návígum, lausir boltar í teignum sem við díluðum illa við."
Vestri hefur átt gott tímabil heilt yfir og verið að berjast í efri hlutanum en niðurstaðan er sú að liðið endar í neðri hlutanum. Liðið átti erfitt uppdráttar í kringum úrslitaleik bikarsins sem liðið vann gegn Val.
„Við erum búnir að vera í efri hlutanum allt mótið. Mér fannst liðið eiga það skilið. Frammistaðan í dag verðskuldar það kannski ekki en heilt yfir er þetta Vestra lið búið að leggja allt i þetta. Við getum ekki neitað því að það var ákveðið fókusleysi í kringum bikarinn og það hefur kostað okkur. Ég er ósáttur með það, við þurfum að þroskast hratt og læra af þeim mistökum og ég þar á meðal. Í draumaheimi hefði þessi bikarleikur verið spilaður aðeins seinna í mótinu en það er ekki hægt að fela sig á bakvið það. Það verður að bíða betri tíma að við getum tekið lærdóm af því, það er langt í næsta mót og næsta bikarleik."
Davíð Smári var mjög ósáttur með sitt lið í dag.
„Við getum ekki gleymt þessum leik í dag það er alveg klárt. Við þurfum heldur betur að brýna aðeins hnífana og fara yfir hlutina. Vestra liðið hefur á ótrúlega stuttum tíma búið til ákveðið 'identity' sem öll lið efstu deild á Íslandi séu að leitast eftir. Það vita allir fyrir hvað Vestra liðið stendur í dag en mér fannst við alls ekki ná að sýna það í 30 mínútur dag sem ég sætti mig ekki við og eitthvað sem mér finnst að leikmenn Vestra eigi aldrei að sætta sig við. Það má setja út á hitt og þetta hjá Vestra liðinu og fólk getur sett út á mig en ef það er eitthvað sem ég mun aldrei sætta mig við er að liðið mitt sé undir í baráttunni og mér fannst við vera það síðustu 30 mínúturnar sem er algjörlega óboðlegt,"
Athugasemdir
