Viðureign Southampton og Burnley byrjaði á ansi furðulegan hátt, þegar Ashley Westwood skoraði beint úr hornspyrnu.

Danny Ings átti að passa nærstöngina en hann virtist ekki alveg vera með sína eigin staðsetningu á hreinu. Í stað þess að hreinsa knöttinn í burt færði hann sig frá honum og leyfði að leka í netið.

Ings bætti upp fyrir mistökin með góðu jöfnunarmarki á 18. mínútu og var staðan jöfn í leikhlé, 1-1.

Matej Vydra var skipt inn í fyrri hálfleik eftir meiðsli Chris Wood og lét hann til sín taka með glæsilegu marki á 60. mínútu.

Ralph Hasenhüttl skipti Michael Obafemi og Che Adams inn á lokakaflanum en þeim tókst ekki að bjarga stigi. Pierre-Emile Hojbjerg komst nálægt því að jafna í uppbótartíma en Nick Pope gerði vel að verja frá honum með brjóstkassanum.

Burnley hirðir því stigin þrjú og fer upp í 34 stig, fimm stigum frá Evrópusæti. Southampton situr eftir með 31 stig.

Jóhann Berg Guðmundsson var ekki í hópi Burnley vegna meiðsla. Líklegt er að hann verði klár í slaginn fyrir næsta leik gegn Bournemouth.