Magnús Haukur spáir í 9. umferð Bestu kvenna

Valur 0 - 1 Fram (14:00 í dag)
Ef einhver hefði hvíslað því að mér fyrir mót að Fram væri þremur stigum fyrir ofan Val fyrir leik liðanna í 9. umferð, þá hefði maður hlegið. Þrátt fyrir bikarsigur í vikunni munu Valskonur tapa þessum leik 0-1 og mun sigurmarkið koma úr óvæntri átt en Freyja Dís Hreinsdóttir mun skora sitt fyrsta mark í efstu deild.

FHL 0 - 2 Víkingur R. (14:00 í dag)
Koma fyrstu stig FHL eða vinnur Víkingur sinn fyrsta leik síðan í apríl? Svarið er einfalt fyrir Víkinga og aðeins erfiðara fyrir FHL. Linda Líf kemst af stað og skorar tvö mörk í öruggum 2-0 sigri.

Stjarnan 0 - 4 Þróttur R. (16:15 í dag)
Gæðamunurinn er rosalegur og eftir vont tap í vikunni rúlla Köttarar yfir Silfurskeiðina bæði í stúkunni og á vellinum. Freyja skorar þrennu í 4-0 sigri.

Þór/KA 1 - 3 Breiðablik (17:00 á morgun)
Fellur Þór/KA á en einu prófinu? Blikakonur eiga enn eftir að spila góðan heilan leik á tímabilinu og það gerist fyrir norðan þar sem Nik spilar vel valinn RAVE lög í klefanum fyrir leik og Agla María gírast öll og setur stoðsendingaþrennu í 3-1 sigri.

FH 4 - 0 Tindastóll (18:00 á morgun)
Það gengur allt í Hafnarfirðinum þessa dagana og verður þetta öruggur 4-0 sigur þar sem Elísa Lana heldur áfram að vera besti leikmaðurinn á vellinum, skorar tvö og leggur upp tvö.

Fyrri spámenn:
Adda Baldurs (5 réttir)
Vigdís Lilja (4 réttir)
Mist Rúnarsdóttir (4 réttir)
Guðrún Karitas (3 réttir)
Katla Tryggvadóttir (3 réttir)
Gylfi Tryggvason (3 réttir)
Emelía Óskarsdóttir (3 réttir)
Ásta Eir (2 réttir)

Hér fyrir neðan má sjá stigatöfluna í Bestu deild kvenna eins og hún er akkúrat núna.