Pascal Janssen, sem hefur stýrt AZ Alkmaar að undanförnu, segir að Albert Guðmundsson megi ekki fara frá félaginu.
Íslendingurinn var í kuldanum eftir að Jansen tók við liðinu en byrjaði í 3-1 sigri gegn PSV í vikunni og spilaði þar allan leikinn. Það var fyrsti leikur Alberts í hollensku úrvalsdeildinni síðan 22. nóvember.
Jansen setti Albert í varaliðið en hann vildi lítið tjá sig um það sem gerðist á milli þeirra. Albert er nú kominn aftur í aðalliðið. Jansen segir að Albert verði að vera áfram hjá AZ.
„Appie (Albert) verður að vera áfram," sagði Jansen að því er kemur fram hjá De Telegraf.
Ferdy Druijf yfirgaf AZ á dögunum en það var ekki eitthvað sem Jansen bjóst við. „Það fór öðruvísi en ég bjóst við. Appie veit það alla vega að hann má ekki fara."
AZ er í fimmta sæti hollensku úrvalsdeildarinnar en liðið á leik ADO Den Haag í kvöld.
Athugasemdir