Hallgrímur Mar
KA vann góðan 2-1 sigur á FH í dag Í Kaplakrika í Bestu deild karla. Hallgrímur Mar Steingrímsson, leikmaður KA, var ánægður með sigurinn í dag í erfiðum leik.
Lestu um leikinn: FH 1 - 2 KA
„Bara virkilega mikilvægur sigur fyrir okkur, þriðji leikur í röð, bara mjög ljúft, sérstaklega eftir ömurlega viku þar sem við duttum úr bikarnum. Það var gott að svara þessu svona þó þetta hafi verið erfitt."
Hallgrímur Mar er einn af lykilmönnum KA hann hefur verið að glíma við meiðsli í upphafi tímabils.
„Ég er náttúrulega búinn að missa úr eiginlega þremur leikjum en heilt yfir er ég búinn að vera fínn. Mér finnst ég svona loksins vera kominn í eitthvað stand í dag og fannst ég geta hlaupið almennilega. Ég er búinn að vera að díla við mjöðmina og búinn að vera smá svona kominn aftur af stað. En ég er bara mættur núna."
Eftir a Hallgrímur Mar kom úr meiðslum hefur KA unnið 3 leiki í röð í Bestu deild karla.
„Við lögðum okkur fram í dag sem skilar alltaf, á móti Þór lögðum við okkur allir fram, en við áttum reyndar slakan leik á móti ÍBV en unnum hann. Hver sigur gefur eitthvað meira sjálfstraust, þannig að þú veist, þetta er bara, þetta er vonandi gefur góð fyrirheit fyrir framhaldið," segir Hallgrímur.
