Hörður er eini Íslendingurinn í liði vikunnar að sinni en níunda umferð tímabilsins kláraðist um helgina. Hörður lék allan leikinn og skoraði í 0-2 sigri gegn Tambov. Hann var valinn maður leiksins.

Með honum í liði vikunnar má finna menn á borð við Branislav Ivanovic (Zenit), Artem Dzyuba (Zenit) og Ari (Krasnodar).

Það eru alls sex Íslendingar sem leika í efstu deild í Rússlandi um þessar mundir og eru fimm þeirra í toppbaráttunni.

Arnór Sigurðsson leikur með Herði hjá CSKA og eru þeir félagarnir aðeins einu stigi frá toppliðunum. Jón Guðni Fjóluson leikur fyrir topplið Krasnodar á meðan Björn Bergmann Sigurðarson og Ragnar Sigurðsson eru hjá FC Rostov.

Viðar Örn Kjartansson er einnig á mála hjá Rostov en leikur fyrir Rubin Kazan að láni um þessar mundir. Rubin hefur tapað þremur leikjum í röð og er með tíu stig eftir níu umferðir.