Emilía Kiær var bæði svekkt og stolt eftir 0-1 tap Íslands gegn Englandi, þar sem íslenska liðið skapaði sér stór færi undir lok leiksins en náði ekki að jafna.
„Þetta er svo skrítið, því það er svekkelsi eftir svona leik. Við sjáum að við erum að skapa dauðafæri í lokin og þá vill maður auðvitað fá meira úr þessu en tap,“ sagði Emilía eftir leik.
„Svo þarf maður samt að hugsa hversu stórkostlegt lið England er. Að fá svona tilfinningu eftir leik á líka að vera jákvætt.“
Lestu um leikinn: Ísland 0 - 1 England
Emilía var í byrjunarliðinu og leið vel inn á vellinum.
„Vel, ég elska að spila með þessum stelpum, þessu liði og spila fyrir Ísland.“
Ísland skapaði sér fleiri dauðafæri í seinni hálfleik og Emilía telur það sýna framfarir.
„Það sýnir að við erum að taka þessi næstu skref sem lið. Við viljum meira og við getum meira.“
Boltinn vildi hins vegar ekki inn þrátt fyrir ítrekuð færi, en hún taldi enga „bölvun“ þar að baki.
„Bölvun? Nei, ég held það ekki. Kannski hefði hann farið inn á öðrum degi. Við höldum bara áfram að æfa, reyna gera betur og byggja ofan á – horfa á það sem við gerum vel og ekki vel.“
Að lokum horfði hún á verkefnið í heild.
„Fullt af góðum hlutum sem við getum tekið með úr báðum leikjunum. Það gerir næsta verkefni ennþá meira spennandi.“
Viðtalið í heild má sjá í spilaranum hér að ofan
