Aðstoðardómarinn í leiknum lyfti flaggi sínu þegar Mateta minnkaði muninn, en eftir skoðun í VAR var markið dæmt gott og gilt.

Tvær myndir voru birtar á opinberum X reikningi úrvalsdeildarinnar til að sýna hvers vegna markið ætti að standa.

Leicester vill fá skýringu frá úrvalsdeildinni því félagið er á því að myndin sem var birt í útsendingu frá leiknum, til að sýna að Mateta væri réttstæður, sé röng mynd.

Fyrri myndin sýnir James Justin, varnarmann Leicester, lyfta fætinum til að reyna stöðva fyrirgjöf Tyrick Mitchell. Mateta er svo inn á teignum tilbúinn að fá boltann. Seinni myndin sýnir Mateta inn á teignum, vel fyrir aftan græna línu.

Leicester er ekki sannfært um að myndin sem sýni að Mateta sé réttstæður sé frá réttu augnabliki; augnablikinu þar sem Mitchell spyrnir í boltann.

Steve Cooper, stjóri Leicester, sagði í viðtali eftir leik að Mateta hefði verið rangstæður og félagið þyrfti að fá útskýringar frá deildinni. Lokatölur leiksins urðu 2-2 og Leicester er áfram án sigurs í deildinni.