Rashford og Baker voru öflugir saman í U21 landsliði Englands.
Miðjumaðurinn Lewis Baker hefur aðeins einu sinni komið við sögu í keppnisleik hjá Chelsea þrátt fyrir að hafa verið samningsbundinn félaginu síðustu fimmtán ár.
Baker er 25 ára gamall og hefur á undanförnum fimm árum verið lánaður til sjö knattspyrnufélaga, þar á meðal Middlesbrough, Leeds, Reading og Fortuna Düsseldorf.
Áttunda félagið var að bætast við og mun Baker leika fyrir tyrkneska félagið Trabzonspor á komandi leiktíð.
Baker þótti gífurlega mikið efni á sínum tíma en það hefur ekki ræst úr honum eins og búist var við. Hann var algjör lykilmaður hjá yngri landsliðum Englands. Hann gerði 8 mörk í 17 leikjum með U21 liðinu og 9 mörk í 14 leikjum með U19.
Baker er samningsbundinn Chelsea til 2022.
Athugasemdir
